పంచ దంపతులు... అంటే తెలుసా..?

ఈ లోకంలో కోట్లాది కోట్ల దంపతులున్నా వాళ్ళంతా 5 విధాలుగానే ఉంటారు.

1. లక్ష్మీనారాయణులు

విష్ణుమూర్తికి లక్ష్మీదేవి వక్షస్థలం మీద ఉంటుంది.. వక్షస్థలంలోని హృదయం ఆలోచనలకు కూడలి. అక్కడే లక్ష్మి ఉంటుంది.., అంటే ఏ భార్య భర్తల హృదయం ఒక్కటై...ఆలోచన కూడా ఆ ఇద్దరిదీ ఒకటై ఉంటుందో.. ఆ జంట లక్ష్మీనారాయణుల జంట.

2. గౌరీశంకరులు

అర్థనారీశ్వర రూపం.. తల నుంచి కాలి బొటన వ్రేలి వరకు నిట్టనిలువునా చెరి సగంగా ఉంటారు. రెండు కలిసిన ఒకే రూపంతో ఉండటం వీరి ప్రత్యేకత.. ఆలోచనలకు తల, కార్యనిర్వహణానికి కాలు సంకేతం.., కాబట్టి భార్యను గొప్పగా చూసుకునే భర్త,  భర్త ఆపదలో ఉంటే రక్షించే భార్య – ఇలా ఉన్నవారు గౌరీశంకరుల జంట.

3. బ్రహ్మ సరస్వతులు

బ్రహ్మ నాలుక మీద సరస్వతి ఉంటుందంటారు.., నాలుక అనేది మాటలకు సంకేతం.. దాని అర్థం ఇద్దరి మాట ఒకటే అవుతుందని.. ఇలా ఏ మాట మాట్లాడినా, ఆ భార్య మాటే మాట్లాడే భర్త, ఆ భర్త మాటే మాట్లాడే భార్య .. ఏ జంట ఇలా ఉంటారో వారు బ్రహ్మ సరస్వతుల జంట.

4. ఛాయా సూర్యులు.

సూర్యుడు చండ ప్రచండంగా వెలుగుతుంటాడు, అతడి భార్య ఛాయాదేవి. అతని తీక్షణతకు తట్టుకుంటూ సాగుతుంటుంది. తన భర్త లోకోపకారం కోసం పాటు పడేవాడు.., విపరీతమైన తీక్షణత కలవాడు... అయినా తాను నీడలా పరిస్థితికి అనుగుణంగా సర్ధుకుపోతూ ఉంటుంది ఛాయాదేవి.. ఏ ఇంట భర్త కఠినంగా, కోపంగా, పట్టుదలతో ఉంటాడో... ఏ ఇంట అతని భార్య మాత్రం నెమ్మది గాను, శాంతం గాను, అణకువ గాను ఉండి సంసారాన్ని తీర్చిదిద్దుకొనే తత్వంతో ఉంటుందో అలాంటి జంట ఛాయా సూర్యుల జంట.

5. రోహిణీ చంద్రులు

రోహిణీ కార్తెలో రోళ్ళు కూడా పగులుతాయనే సామెత ఉంది. చంద్రుడు పరమ ఆహ్లాదాన్ని, ఆకర్షణను కలుగజేసేవాడు, ఏ జంట భర్త లోకానికంతటికీ ఆకర్షణీయుడై ఉంటాడో, భార్య మాత్రం కఠినాతి కఠినంగాను, కోపంతోను, పట్టుదలతోను ఉంటుందో ఆ జంట రోహిణీ చంద్రులు.